मायक्रोसॉफ्ट टच मावस घेवन येता विन्डोस 7 वापरप्यां खातीर एक स्पर्श आदारीत भोंवडी. एक सादो नमळायेचो मावस मुखार हाडला जो विन्डोस 7 वापरप्यांक दिता तांच्या संगणकाकडेन संवाद सादपाचो एक नवो मार्ग. नव्या मायक्रोसॉफ्ट टच मावसांत आसा पोन्नो मावसाचे सगळे गुण- जो 1960 सावन सतत वापरांत आसा- आनी ताचे वांगडा भोव-स्पर्शी हावभाव. विन्डोस 7 वापरपी लक्षावधी लोकांक हो नवो मावस दिता तांच्या संगणकाच्या ऑपरेटींग सिस्टमीत भोंवडी करपाचो एक नैसर्गिक मार्ग.

हें पयलेच फावट आसा की मायक्रोसॉफ्टान एक अशें उपकरण सोदून काडलां जांतून एका मावसाचें नियंत्रण आनी अचूकताय हाचे वांगडाच स्पर्श तुमच्या संगणकाचेर दिता तशी परस्परक्रियाय आसा. हें वापरतल्यांक तांच्या संगणकाचेर ताबो दिता जो वापरपी आपल्या बोटांनी अनुभवूंक शकतात.
टच मावस वापरप्यांक तें सगळें करूंक दिता जें मावसा वांगडा करपाची तांका सवय आसा, जशें नेम धरून क्लीक करप, पूण हांतूत भोव-स्पर्शी कार्यात्मकतेची भर घालता जी वापरप्यांक तांच्या बोटाच्या एका टिचकेंतल्यान विन्डोस 7नांत सोंपेपणान आनी वेगान भोंवडी करपाक मजत करता.
विन्डोस बारीक आनी मोटे करप, संकेत थळांच्या पानांनी स्क्रॉल करप, अशो सगल्यो क्रिया ज्यो वापरपी सदांच करता, त्यो मावसाच्या सामके वयर फक्त बोटाच्या एका स्पर्शातल्यान उपलब्द जाता.

टच मावसातल्यान वापरपी कितलेशेच मार्गांनी भोंवडी करूंक शकतात-
एक बोट वापरप्यांक ते ज्या पानार आसात, त्या पानातल्यान 360 अंश कोनान स्क्रॉल करूंक दिता.

दोन बोटां वापरप्यांक तांचेकडल्यान वापरांत आशिल्ल्या सक्रिय विन्डोचेर ताबो दवरपाक आनी विन्डो बारीक-मोटो करप वा दावे-उजवे वटेन हालोवपाक दिता.
तीन बोटां वापरप्यांक वेगवेगळ्या कामांमदी स्वीच करून वा सगले उकते विन्डो बंद करून सगलो डेस्कटॉप हाताळपाक दिता.

आंगठ्याची एक टिचकी वापरप्यांक इंटरनेट एक्सप्लोरर, पावर पॉयंट आनी विन्डोस फोटो विवर हेसारक्या कार्यावळींनी फुडें आनी फाटी वचपाक दिता.
टच मावसाच्या भूलोवण्या साद्या डिजायनांत दडला दोन वर्सां परस चड काळाचो क्रॉस-कंपनी सोद. रेडमंड आनी कॅम्ब्रीज हांगचे मायक्रोसॉफ्ट रिसर्च पंगड आनी मायक्रोसॉफ्ट हार्डवेअराचो अप्लायड सायन्सीस ग्रूप हांचे जोड पालवान 2008 वर्सा सुरू केल्ल्या मावस 2.0 प्रकल्पातल्यान हें उत्पादन तयार जालां. एका प्रमाण मावसाची योग्यतायेंचो भोव-स्पर्शी संवेदनशीलतायेकडेन मेळ घालप ही तांची मोख आशिल्ली.

वापरप्यांचे प्रतिक्रियेचेर विसंबून पंगडान सुरवेक तंत्रगिन्यानाच्यो कितलेशोच पद्दती आनी संवाद प्रतिमो (इंटरेक्शन मॉडेल) धुंडाळ्ळ्यो. भोव-स्पर्शी संवेदनेचे विंगड विंगड प्रकारांचे प्रतिनीधीत्व करपी अश्या पांच वेगवेगळ्या सोद नमुन्यांचेर येवन ते थांबले- कॅमेरा आदारीत, स्पश्टोच्चार करपी, म्हणजे तांणी तीन मावस संवेदक (मावस सेंसर) एकठांय केले- आनी कॅपॅसेटीव, जांतूत लॅपटॉपाच्या ट्रॅक पॅडासारकी कार्यात्मकता आसा. खबरदारीन सगलो विचार केले उपरांत पंगडान कॅपॅसिटीव-सेंसींग निवडलो, कारण तो मावसाचो वळखीचो असो आकार न्हयकारीनासतना भोव-स्पर्शी हालचालींक मान्यताय दितालो. हातांत आरामशीर उरपाक जाय आनी ताचेच वांगडा पांचूय बोटांनी नैसर्गिक हालचालींक जुस्त जागो मेळपाक जाय हें मतींत दवरून तांणी कितलेशेच संभवित आकार तयार केले. पंगडान वापरप्यांमदी व्यापक सोद घेतलो आनी शेंकड्यानी प्रकारचे आकार आनी नमुने हांचे परीक्षण केलें आनी मागीर 23 अंश पालसणीचो मावस निवडलो, जो वापरप्यांक ताची रचणुक जाचे खातीर केल्या तीं हालचाली करपाक आरामशीर आकार आनी पुरोशी सपाटताय दिता.

कितलेशेच म्हयने तांणी संवेदक रचना (सेंसर डिजायन) शुद्ध करप आनी कार्यात्मकता ओडप हाचेर सतत काम केलें. हाचे परिणामातल्यान तयार जालो टच मावस जो संगणकाचे धनयाक विन्डोस 7ना मदली ताका सगल्यांत चड वापरूंक जाय त्या वैशिश्ट्यांनी नैसर्गिक हालचाली वापरून शिरपाक दिता. स्पर्श हो तंत्रगिन्यानाकडेन संवाद सादपाचो एक वाड्टया लोकप्रियतायेचो मार्ग आसा, पूण तो चड करून हातांत जावपी ल्हान उपकरणांनी वापरतात. थेट स्पर्श तंत्रगिन्यान कांय उपकरणांखातीर बरें आसू शकता पूण हेरांखातीरूय न्हय. तें डिजिटल चित्रांनी स्क्रॉलींग आनी फ्लिकींग करप म्हणजे वारें कशें करून उडयता, पूण एक्सलातल्या एका ल्हान कोशांत क्लीक करप तांतूतल्यान शक्य जांयना.

विन्डोस 7 वापरपी कांय अंश लोकांकडेनूच स्पर्श आसा तोय चडसो हार्डवेअरांत. टच मावस हो विन्डोस 7 वापरपी लक्षावधी लोकांखातीर स्पर्श हाडपाच्या मायक्रोसॉफ्टाच्या प्रयत्नांचो एक भाग जावन आसा. हेर उपकरणां जावन आसात, एक्सप्लोरर टच मावस, आर्क टच मावस आनी आतां रोखडीच येवपी टच मावस आर्टीस्ट आवृत्ती.

टच मावस हो संगणकाच्या भोव-स्पर्शी इनपूट उपकरणांमदलो एक भूंयस्तंभ आनी फुडें येवपी गजालींची सुरवात जांवन आसा.